U pinnularu

Scene da un matrimonio, prima parte

Cci chiedivi a Tonino ma mi cunta  quandu si spusau. Vi riportu chiddhu cchi mi dissa (a puntati)

Doppu sei misi chi avìa iungiutu sulu sordi e risparmiatu puru l’aria – a lu punto ca ppè sigaretti fumava i muzzuni chi trovava ‘nterra e ccu a 126  caminava a motore spentu ccu u rischio ma mi partanu i freni e m’ammazzu ‘ncunu ala scinduta de barracchi- arriva u u jornu fatidicu: chiddhu do matrimoniu.

Avìa fattu tutta a preparazione ala chiesa, e ‘nu bravu previta m’avìa spiegatu ppè filu e ppè signu diritti e doveri coniugali. L’ultimu iornu mi dissa però ‘na cosa chi mi restau impressa: i soldi non sono importanti. Eu cchi avia dintra a sacca u carnet da Bnl, attrimenti iddhu parrava moltiplicava l’imbitati ppè a quota do ristorante e penzava: ma si ccu i busti ‘on arrivu ala quota mi duna iddhu i sordi? Alu proprietariu chi ci dicu… ca i sordi ‘on sunnu importanti?

Insomma, u primu d’agosto arriva e m’haiu e presentara ala chiesa ‘e Squillace. ‘A scelta fu strategica pecchì ala preparazione m’avìanu dittu ca eu, in quantu masculu, avìa d’aspettara ‘a fimmina davanti all’entrata da chiesa. Spiego ppecchì fu strategica.

A mia in pratica mi toccava ‘a chiesa ala Marina, propriu a principala, davanti a chiazza cchi seta sembra trafficata. Nda vitti candusci cu u mazzettu ali manu chi aspettavanu… e duranta l’attesa ncunu figghiu e ndrocchia cchi passava cu a machina on è ca u guardava e basta, gridava puru: “ma cu cazzu tu fa fara, se… ma mugghieritta è bona? Nesciru i cornetti? “ Chissi l’interventi cchiù delicati, non vi dicu l’atri.

Allora a mugghierimma ci dissi  “se… vitti na chiesiceddha ammucciata duva nuddhu ma caca, e si mi spusamu ali cinqu eu pozzu puru ma mi presentu ddhà davanti ali tri, tantu ‘e ddhà ‘on passa nessunu.”

Approvato e daccussì ficimu. Ali dui mi preparu, mi vestu e ccu a 126 a folle  m’avviu versu Squillace. Ala Sala mi fermu ppò cafè e ncontru a n’amicu cchi mi dicia ” e duva cazzu vai a st’orario?“.

Ed eu: “vaiu e mi spusu”

E iddhu ancora: “Cchi è, mi cugghiunii?”

Mu dissa pecchì era  vestutu sportivo: nu vestitu celeste pastello fosforescente, scarpi tipo tennis ianchi e cravatta cu certi fiori cchi paria u corsu e Catanzaru quandu era isola pedonale, insomma chiddi fiori chi duranu duva nui ‘e Natala a Santu Stefanu.

E cca mannajalaculonna, quandu giravi ppè u vestitu, Melinu mi presentava i soliti culuri: niguru, grigiu e blu. Eu ci dissi, vabbò ca si dicia ca cu u matrimoniu si mora, però chistu mu stuipu ppè quandu moru daveru. Arrivatu a Squillace fici a prova e sulu subba l’altara cu chiddu cagnareddhu ‘e mazzettu: facìa caddu e pigghiava u sula e allora nell’attesa mi iettavi subba na panchina e mi misi ma fumu ca m’avia finalmenta accattatu i sigaretti pensandu: possibila ca ali busti on recuperu nenta?

Versu i cinqu menu vinti, ala funtanedda vicina mi consu u capiddu cu l’acqua tipo gel e vaiu e mi mintu in posa avanti ‘a porta. Arriva mugghierimma, a verità era bedda e quandu s’avvicinau a prima cosa chi cci dissi pima ma cci dugnu u baciu chi m’avianu spiegatu ala preparazione fu: “se, quantu cazzu u pagasti stu vestitu?”.

‘E lontanu viu a mammima e patrimma, quando mi vittaru vestutu colorato sgargiante a iddhi i vitti ianchi ‘na carta, e u labiala ‘e patrimma mu ricordu ancora: “madonna cantaru e figghiu chi haiu”. Ciau papà.

Ni spusamu e pronuncio il fatidico sì. Benedica chiddu chi canta l’Ave Maria prima ancora ma sona l’ultima nota l’avia già d’arrretu chi mi cercava i 250milaliri pattuiti…

Nescimu da chiesa: riso, applausi, bacio e abbracci.

Terminata ‘sta prima fase, chiddha cchiu spirituala (ccui cagni), m’avviu mano nella mano ccu mugghieruimma versu a machina e m’appiccicu ‘na sigaretta. I pantaloni avianu a risvolta e a nu certu puntu sento calore, viu subitu fumu, ed essendu eu grande tifoso, pensavi ca l’ultras m’avìanu fattu i fumogeni… e ca cui  u ‘mbitau ad Amendola?

E imbecia nenta coreografia… a vrascia da sigaretta s’avia azziccatu ala risvolta e i pantaloni stavìanu pigghiandu a focu. Nu caforchio e addio pantaloni… menu mala ca avianu a risvolta e non si notava nenta.

Continua…

 

Mistuffo

A proposito dell’autore

Redazione

Redazione

Dal 2002 il portale più letto e amato dai tifosi giallorossi del Catanzaro

Lascia un commento